絲絲講場：李福兆棟篤笑爆料
證券商協會30周年破天荒邀得有「股壇校長」之稱嘅聯交所前主席李福兆出席，佢與「好兄弟」兼立法會議員詹培忠喺晚宴上演嘅一場「棟篤笑」，簡直令人拍案叫絕。
「股票宜燉不宜炒」
雖然校長自嘲係「無業游民」，但其實佢不知幾精靈！詹培忠話校長6歲開始識炒股，叫佢傳授啲炒股秘笈畀大家，校長澄清話自己唔係炒股，只係先父叫佢「股票可以買啲，唔使賣o架。」佢仲話股票「長期宜燉不宜炒」，因為燉最多只係乾水，但炒就可能會燶！
詹培忠又問，校長當年明明喺外國讀會計，點解返嚟會做咗股票呢行？校長話真係因禍得福，佢當年讀完書返嚟曾做過會計，當時有一、兩個客仔籌備上市已成熟，但當年只有香港會一間交易所，香港會話好忙，做唔切呢啲本地「股仔」，自認唔好老脾嘅佢決定自立門戶，自己搞交易所，費事畀外國人壟斷，並與拍檔王啟銘一拍即合，最終喺一九六九年成立遠東交易所，亦確立咗華資喺證券界嘅地位。
為87股災停市平反
大家都知校長喺八七年股災一役，停市嘅決定引起外間廣泛批評，佢亦為呢宗事件平反。佢承認回顧過去30年，最震撼嘅事一定係八七股災，佢話當時成交不斷增大，但交貨嘅行家卻好遲，如果當時唔停市嚟疏導成交，會如雪球般滾大，連銀行都可能被拖垮，故停市目的係要疏導成交，唔係要阻止跌市。
蔡陳葆心再為校長幫口，話喺停市前嗰晚美股大跌，當年嘅財政司翟克誠話校長係專家，由校長決定是否停市，最後引來外界強烈反彈時，翟克誠就反口話校長冇諮詢過佢。
大家依家成日講上海同香港競爭，校長話上海一定會大過香港，但唔代表香港冇得生存，上海應與香港合作，好似美國一樣有幾家交易所。佢仲話從前餅小香港佔大份，日後餅大香港佔小份，但香港可能會更得益。
佢最後寄語希望喺自己有生之年，業界做多啲嘢，令金融業發展更進一步。
余絲韻