印度突然加息，加上希臘問題轉壞，美股上個禮拜五率先回吐，港股真係弱個弱煲，人哋美股升，港股就牛皮，人哋回番幾十點，恒指就插水四舊，點玩？阿爺再出手打擊過分瘋癲嘅地價，市場本來擔心周日會加息，點知安然度過，內房股未有大跌，個別仲有得升添，睇怕港股仲係升唔起跌唔落嘅境況。
尋日大市真係悶到爆，誇張啲講，連蒼蠅飛過都聽到，咁搞落去大家都係等運到。環保能源概念仍然係市場追貨嘅目標，光大國際（00257）早前公布業績，集團表示已經進軍了兩個光伏發電項目，更預計今年可以投入營運，而大摩亦睇好光國前景，指未來兩年盈利可達28%年複合增長。公布業績後，近期股價再回試100日線3.88元支持，打好底隨時回升，不妨小注捧場，今年要升穿5元應該唔難，止蝕位可以考慮3.6元。
古晨