市場熱線：中國無線捧場客多

古勝執筆時，歐洲魚缸亦唔精神，睇嚟今日本地魚缸瓜多過菜，或要進一步向下尋找支持。幸而祖國魚缸靠穩，家電股跟錢莊股支撐大市，而昨日本地魚缸跌市未見成交額增加，只要守住50日線，即20,828點，本地魚缸暫未轉弱勢。

紅色錢莊快見真章

大笨象插水，盤中低見79元，收報79.25元，係近幾個月首次收低於80元。不過，大笨象已落實回歸祖國魚缸，缸湖亦有傳聞祖國為提升國際形象，上海交易所國際板隨時拍板，大笨象或因此再成市場焦點。祖國移動（00941）公布二月份上客551.8萬，較一月份511.5萬增長7.88%，其中，3G客戶數428萬，較一月增加了38.2萬戶，表現不俗，但股價不敵魚缸跌勢，錄得1.7%跌幅，收報75.25元。藍色大隻佬全部插水，跌幅由0.1%至4.5%不等。

咖喱國加息，惹來缸邊友憂慮，祖國或有樣學樣，以「息魔」鎮壓「通脹怪獸」，本地及紅色地主均見沽壓。至於古勝長線睇好的紅色錢莊，其中三大巨頭，中行（03988）、工行（01398）及建行（00939）分別在今日，後日及周五派成績表，昨日普遍跌2%，惟上周紅色錢莊已洗頹風，強勢迎接業績公布，股價重上50日線，話唔定業績公布後見真章。缸邊傳聞指三大巨頭的融資方案各有進展，只係工行下月有一批由「高佬盛」持有的限售股解凍，怕為其添沽壓。

3G手機銷情看漲

昨日個別電訊設備股逆市做好，皆因唔少公司預期今年可擺脫去年疲弱的經營環境，○九年度成績表唔會再見紅。中國無線（02369）是目前祖國手機的龍頭之一，覆蓋祖國三大3G制式的高中低檔全系列產品，是同業中最多元化的生產商，並獲缸邊友支持。自3G啟動後，今年應該係更換3G手機的高峰期，預期今年中國無線的土炮3G手機（TD-SCDMA）銷量或急漲6倍，盈利自然水漲船高。

為配合市場需要，集團上月宣布東莞生產基地已正式啟用，全面投產後預計產能可達4,000萬台，為祖國最大的3G手機生產基地，將帶動其規模效益。雖然缸湖多次有傳聞中國無線玩批盪，但古勝收到風，多間券商向其招手，管理層亦不為所動，反映公司惜貨如金，亦對3G手機銷售前景極具信心。

古勝