絲絲講場：李小加國金Cafe打躉
尋日絲絲喺國金中心做完嘢想歎番杯咖啡時，咁啱撞到喺國金一期返工嘅港交所（00388）行政總裁李小加嚟買咖啡，原來佢都係咖啡迷，朝朝都幫襯國金呢間大型連鎖咖啡店，如果中午冇約人食飯，佢亦會去呢間咖啡店「打躉」。聽聞佢每朝好早就返工，如果想喺早上撞到佢買咖啡，睇怕都要早啲起床至得！
少說話多做事
見到李小加，絲絲自然唔放過機會，問吓佢關於港交所嘅消息，譬如新增嘅市場發展科依家請人請成點、3年策略計劃進展以及大家最關心嘅人民幣投資產品有冇新嘢，但李小加就大耍太極，點都唔肯坐低做訪問，佢仲話自本月初喺港交所年度業績記者會公布3年策略計劃後都冇做過訪問，因為佢依家要專注策略計劃嘅落實工作，做實務要「少說話，多做事」。
雖然佢多番迴避絲絲嘅問題，但都算態度友善，佢係投資銀行出身，見慣不同客戶，自然禮多人不怪。
余絲韻