靠網絡致富嘅人不斷湧出，放棄如日中天嘅事業，搞咗個叫「優米網」視頻網站嘅央視製片人兼知名主持人王利芬，係咪下一個就未知，佢喺網上推出咗一個《拍賣時間》嘅欄目，第一個要「拍賣」嘅就係話題人物史玉柱。
首先畀王利芬拍賣嘅，係史玉柱寶貴嘅「3粒鐘」，成功投到嘅人就可以與史玉柱共度3個鐘頭。競投時間從周一開始直至六月十五日，「起拍價」係100蚊人仔，只要叫價仍未高過5萬蚊，每次叫價只能加100蚊。
聽講依家最高已叫到19,888蚊，而且出價者眾。咁睇落去，到咗六月十五日嗰日，中標價唔會低。到時就知道呢位被譽為中國商業奇才，曾經重重跌過一跤但又重新冒起嘅巨人，與股神巴菲特拍賣午餐嘅價錢差幾多嘞。優米網主要內容係與創業、創新有關，王利芬中年創業，呢一炮都幾吸引喎。
余絲韻