「拆」數分析 了解涵義

莉莉︰高妹，因乜嘢事將二月份日曆填到密麻麻？吓？上面冇約會嘅時間地點，全部都係經濟數據，你冇人約都唔使填滿個日曆製造假象嘛！

高妹︰你新年夠冇嘢做留喺屋企剝瓜子啦，哈哈！呢啲全部都係非常重要嘅貿易、銷售數據及企業業績嘅公布日子，我已集齊所有數據由頭到尾睇一次，搞到頭都暈。

莉莉︰呢排最多人談論嘅「資產通脹」及「資金流動」話題，你從中有乜發現？

高妹︰唔知喎，所以我請教咗阿Nick，佢有逾20年經濟宏觀分析經驗，管理嘅團隊有14名經濟師。阿Nick，平時你係點樣分析數字洞悉未來經濟脈搏呢？

Nick︰我肯定唔會睇晒全部數據，記住「數字係幫你分析問題」，指導你分析想知嘅嘢，假若想知道通貨膨脹係咪會來臨，就要將CPI（綜合消費物價指數）內含嘅數字拆出嚟睇，比較邊啲增加多啲同少啲；仲要睇埋其他國家嘅數字，若認為係食品推高CPI，則可看食品來源地嘅通脹情況，但主要嘅食品來源地都有好多，包括中國、澳洲及泰國等。呢啲只係初步睇數功夫，一個人喺某段時間只可以專心一件事，我經常睇大圍經濟，好容易忽略個別行業投資；另外，亦要靠其他有見地嘅人如行家及學者等提供嘅分析，由市場談論得最多嘅問題出發，再從數字中尋求答案。

莉莉︰之不過市場上好多人會「砌數」，例如按月及按年數字邊樣會影響股市？

Nick︰每個數字背後有自身嘅涵義，舉例內地按年CPI由負轉正，但要清楚係由於一年前基數太低所致，所以未有通脹壓力。家陣大部分人擔心「資產通脹」，害怕遲早收縮令經濟出現雙底衰退，其實就搞錯晒，「資產通脹」唔等於「消費品通脹」，大家唔好將正面嘅嘢睇成負面。

聚焦「保十」 內資撐港

高妹︰你預計今年中港經濟嘅復甦會有幾好？

Nick︰今年全球經濟增長肯定唔會靠美國，從中央鼓勵航運類企業包括廣東省沿海一帶地區，將出口業務轉回內銷市場，以及刺激農業和基建等多方面內需發展嚟睇，估計今年GDP（國內生產總值）增長為10%，上半年高於10%，下半年則喺10%樓下；內地CPI料拾級而上，上半年達3%至4%，全年平均約3.5%。另外，今年本港GDP增長估計有4%，而CPI因涉及租金，反映數字會較滯後，料只有2%增長。

莉莉︰經濟向好，你點睇股市前景？

Nick︰近期跌市唔關資金流入流出嘅事，目前銀行體系結餘仍有逾千億元存款，資金仲係太多，大市調整嘅兩大元兇係美國金融改革及希臘財赤危機，一旦銀行監管立法後，有機會變成國際規例，影響銀行業前景，但過程需時3年以上，現階段唔使過分擔憂；希臘債務危機嘅威力比金融海嘯差好遠，再爆發下一次「地震」嘅機會好微。所以對我哋最有影響嘅，都係中國能否「保增長」，若內地經濟得以「保十」，帶動內企盈利做好，加上中國有意將資金向外流，唔想揸太多美元及國債，寧願投資一啲資源性產品及高端科技，部分內資會流入香港，估計今年股市有少少增長，但唔會有去年嘅升幅。

「唔熟唔做 買得安心」

高妹︰咁邊啲行業嘅股份會做好？

Nick︰好問題，我都想知，就算「全世界冧晒，唔代表每個人都會死」，投資者對大市嘅負面情緒唔應該太多。心水投資就冇喇，但可以確認美國經濟依家處於「Jobless recovery」（無業下嘅復甦），想知喺呢個復甦期應該投資邊一類資產，我就唔識答。

莉莉︰你對樓市有乜睇法？

Nick︰出面啲人睇好樓市，因為本港樓宇供應係30至40年以來最低，投資者就要問自己邊一類型嘅樓會受惠，再睇數據發現原來係住宅，但係邊個地區嘅住宅？中半山供應少，將軍澳就好多，所以每次都要不斷問自己問題。我認為樓市比較本土化，由樓宇供應配合政策取向，樓市基本上向好，去年資金分布唔平均，只集中喺「超豪」嘅豪宅，唔係所有豪宅都升；估計今年大額投資只有很少數，隨着經濟慢慢復甦，市民對樓宇需求擴大，樓市料會平穩增長。

高妹︰可否分享一下多年來嘅投資心得？

Nick︰「明白先做，唔熟唔做」。點為之熟？就係買得安心，輸得值得。

65%股友料虎年首日升

趁着大年初四，預祝虎年第一日返工嘅上班族開工大吉、鴻運當頭，恒指喺虎年首個交易日節節上升！據今期《東方產經》網上民意調查，截至晚6時，有65.4%人憧憬年初四大市揚升，估計唔會升嘅只有34.6%。

高妹、莉莉

若有料報畀高妹同莉莉或有嘢問，可電郵money.biz@opg.com.hk