祖國再次調高錢莊存款準備金率，缸邊友都憂慮是否「退市」行動展開，但在下認為人行此舉總好過請「息魔」出手，只要歐美魚缸表現良好，今日本地魚缸仍有機會開紅盤。

祝願股民「虎進金來」

花旗在去年十二月份錄得外資淨流入，唔少企業相繼調高今季盈利預測，均對花旗魚缸帶來支持。上周五花旗魚缸在人行宣布調高存款準備金率後，一度顯著下跌，但在散場前，道指大幅反彈百點，並成功企穩在萬點關之上，預測花旗魚缸在總統日假期後，能大跳彈床兼扭轉跌勢。

新界鄉紳大老為香江求得中籤，虎年或先苦後甜，古勝唔係導人迷信，但先苦後甜總好過得個「捱」字，估計在正月過後，本地魚缸能重拾升軌，回復升勢，只要投資得宜，一定能苦盡甘來，又或如友人所贈新年賀辭，「虎進金來」也！

祖國魚缸下周一才照常營業，難得有成個禮拜長假，唔少祖國表叔，都選擇呢段時間出國旅遊增廣見聞，又或於國內遊覽，多了解本國文化。

每年春節，都係祖國旅遊旺季，呢段時間亦係旅行社豬籠入水的時候。央企重組已於去年加速進行，今年仍然係投資市場一大主題。在整合過程中，央企每每被要求簡化業務，以重點發展主業為主，剝離非核心業務，係每個行業的重點整組流程。國資委早於去年底，要求央企須於3至5年將非主業的賓館酒店分離重組，香港中旅（00308）定能成功為政策受惠者，今年極有可能在年內再獲注資。

受惠酒店資產重組

目前以旅遊為主業的央企數目寥寥可數，香港中旅阿媽中旅集團是其中一間。近年中旅積極推動香港中旅的資產重組，包括出售表現未如理想的內地旅行社業務，並注入新景點等旅遊項目，以期改善整體營運表現，更有效地發揮其融資功能。

考慮到祖國未來對旅遊產業的支持，優質酒店資產傾向央企集中，對規範行業運作、提高行業水平有正面作用。從這個角度看，在參與重組這些酒店資產的過程當中，中旅別具優勢。

古勝