高盛奧尼爾話明唔買

奧尼爾於英國長大，喺曼徹斯特市讀書，細個踢波嗰陣已經捧曼聯，後來喺格拉沙入主曼聯之前仲做過董事，○五年嗰時持有166萬鎊曼聯股票，時至今日，佢仍然手執曼聯主場奧脫福嘅季票。

不過佢對曼聯呢批孳息率達8厘以上嘅債券認真興趣麻麻，話明唔會買之餘，仲話曼聯依家太高槓桿，唔係一件好事。依家好多球會都債台高築，曼聯就算喺去年以天價賣走「C朗」，都仲差好遠先填到條數，過多三、五、七年都唔知點收科。

奧尼爾最為投資者熟悉係佢「設計」金磚四國呢個講法，近期佢亦預測人民幣有機會一次升值5%，佢話今次呢批曼聯債券抵唔抵買就見仁見智。不過事實就係呢批債券一發行咗後就即刻「插水」，奧尼爾可能寧願買人民幣都唔買曼聯債券。

余絲韻