本文重點
「大笨象」滙控（00005）去年九月宣布將CEO辦公室東移香港，事隔幾個月，CEO紀勤今日終於動身，帶埋太座由倫敦飛嚟香港。雖然整個遷徙計劃喺下月一日先生效，不過紀勤聽日已開始喺香港總行返工，即使佢唔係電影明星，相信亦會引嚟大批傳媒喺樓下等佢，一睹佢嘅風采，幫佢影番啲靚相。佢抵埗後即會密密會見政府高官及傳媒。
葛霖傳年半後退休
紀勤今次坐鎮香江，佢哋總行嘅同事真係要打醒十二分精神，第一件事就係執到自己嘅工作範圍乾乾淨淨。咁就係啦，梗係唔可以留下壞印象畀集團CEO啦！
紀勤走咗之後，倫敦嗰邊就剩低主席葛霖獨撐，講開又講，葛霖上場做「大笨象」主席後，都好似冇乜好日子過，櫈都未坐暖就出現次按問題，跟隨再嚟個金融海嘯；依家叫做稍為好番啲，市場就傳佢好快走人，早前先至傳佢會做英倫銀行行長，日前又傳佢喺18個月內退休，講到似層層。傳聞有機會接佢個位嘅人並唔係紀勤，而係高盛前高層約翰桑頓（John Thornton）。
絲絲記得滙豐主席個位係冇退休年齡，葛霖依家至61歲，上手主席龐約翰退休時就65歲，葛霖係咪一年半後退休，從年齡上分析就好難講。
余絲韻