網誌惹揣測急澄清

唐駿喺○四年離開微軟中國後，曾經應盛大陳天橋之邀出任盛大網絡總裁，至○八年又被福建首富陳發樹以十億元人民幣挖角，離開ＩＴ界出任內地民企新華都集團總裁，因而被冠以「中國打工皇帝」嘅外號。不過唐駿近日就喺佢自己嘅網誌內，突然話自己「回歸ＩＴ……重回自己熱愛嘅產業」，網誌一出街，網民就開始揣測佢嘅去向，甚至繪影繪聲指佢將加盟Google，搞到唐駿要即刻澄清。據講佢當初所暗示嘅，其實係新華都喺ＩＴ行業所進行嘅投資，而唔係代表佢另有發展。

雖然唐駿轉工只屬「流料」一宗，不過中國ＩＴ界喺近一個月的確係有唔少叫人注目嘅人事變動，其中好似三星中國營銷副總裁曲敬東過檔祖國新興ＩＴ品牌愛國者；百度創辦人李彥宏嘅得力助手、百度ＣＴＯ李一男離職外闖等。隨着農曆新年臨近，ＩＴ界人事變動嘅消息肯定會更趨熱鬧。

余絲韻