本文重點
港交所（00388）早前舉行周年晚宴，由於行政總裁周文耀離別在即，今年嘅周年晚宴同以往有啲唔同，其中最特別應該係當晚港交所首次影咗一張全體800名員工嘅「全家福」大合照作為紀念。唔講唔知，港交所員工有八百幾人，當晚除咗要當更或放假嘅員工冇影到「全家福」外，幾乎所有員工都有親身參與呢個歷史壯舉。
周年晚宴周總做主角
當晚嘅晚宴喺灣仔會展舉行，呢張「全家福」亦喺會展嘅大禮堂拍攝。睇嚟呢張相除咗極具紀念價值外，相片Size都要「有番咁上下」，否則要喺相中認番各人嘅樣貌都唔係易事。
周文耀係歷來任期最長嘅交易所行政總裁，員工難捨難離在所難免，當晚港交所主席夏佳理、候任行政總裁李小加及部分董事都有出席。
絲絲尋日喺證券及期貨業職工會酒會碰到蔡陳葆心，佢話已鐵定於下周二喺中環大會堂歡送周文耀，將筵開40席，李小加都會出席。
港交所股價呢兩日因港股成交急增而爆升，唔通為周文耀榮休贈興？
余絲韻