當年做「o靚」唔順氣

依家喺北大教書嘅黃鐵鷹話，佢喺八八年加入華潤，做寧總當時唯一嘅「G」，其實條氣真係好唔順，覺得寧總只不過係好彩，早過佢少少入華潤啫。不過，冇幾耐佢就明白寧總點解可以做老細，仲係一位出色嘅老細。事緣佢畢生第一次去意大利公幹，就係同寧總去，當年佢唔記得帶恤衫，但又想慳錢所以無買，惟有着T-shirt打底，外面就着番套老西，就咁同寧總喺意大利大街小巷度逛，仲拜訪咗意大利時裝界商人添，當時寧總好似冇嘢咁，帶住佢周圍去。佢話呢件事令自己明白到，寧總呢種視而不見嘅方式，先可以令唔完美嘅下屬發揮所長。

余絲韻