不過自從接手東航後，劉紹勇話冇時間再行山，為咗改善東航嘅財務狀況，返工變成生活中最重要嘅部分，佢話：「每天上班『白加黑』，每周工作時間『非常六加一』。」忙到咁，連千里迢迢到上海探佢嘅阿媽同老婆，都冇時間同佢一齊食餐飯。

提振東航 全力減虧

劉紹勇咁忙，但係機師出身嘅佢，偶然都會換上飛行服，親自揸飛機飛去想去嘅地方，過吓機師癮。至於呢位機師點樣帶領東航飛出虧損陰霾？佢就話，政府決定救東航，「已經換了班子、給了票子，然後就要看我們怎麼找路子。」

為咗節流，佢上任唔夠一個月就提出256項減虧措施，然後就帶頭減薪10%至30%，仲將中高級管理人員職位作公開招聘。為咗議案可獲通過，佢又試過搭經濟客位去搵一名股東，說服對方喺股東大會投贊成票，果然同佢行山一樣咁有魄力。

余絲韻