桃子期貨投資實例

睇報紙話今年美食展有參展商賣「桃子期貨」，只要14,000元，可以買一棵喺日本富士山農莊種植嘅桃樹一年後嘅收成，到時桃子就空運到港畀你。報道話，保證收成唔少於200個桃子，即平均70蚊一個甚至更平，平過依家超市賣緊約90蚊一個。計一計，回報率有約28%，好過唔少股票。等一等，我諗得複雜啲。

既然保證唔少於200個桃子收成，咁係咪收成愈好就愈着數呢？要視乎情況，如果桃子零售價一年後仍然維持約90蚊一個，「桃子期貨」確係幾好嘅投資，保證有200個桃子收成，即係已保證最少28%嘅回報率，收成愈多，回報率愈高。

不過，如果桃子零售價會跟市場供求，如收成與市場喜好而變化嘅話，情況就複雜好多。先假設桃子漲價呢個相對簡單嘅情況，如果桃子漲咗價，即使你只收到保證最少嘅200個收成，回報率已高於28%，同樣係收成愈多，回報率愈高。

風險管理要識計數

相反，如果桃子零售價下跌，情況相對複雜。假設只收到保證嘅200個桃子收成，若零售價跌，自然得唔到28%嘅回報率，一旦零售價跌穿70蚊就直情要輸錢。另一個可能係零售價跌，但收成大增，多出嘅收成或者可抵銷跌價嘅損失，結果要視乎跌價與收成增加嘅情況。

所以保證最少200個桃子收成，唔代表保本或保值，賣家冇講過保本，買家唔好一廂情願。投資一定有風險，因未來嘅事冇人肯定，但可能發生嘅情況你有冇預先估計？每個可能性嘅機會率又係幾多？呢個係風險管理，唔止係投資，做人做事都應該咁樣，就當係送畀大家嘅聖誕加新年禮物。

（大健）