美林前高層變「演講天王」
音樂停定，胡立陽喘着氣解釋，「投資和跳舞一樣都需要節奏，買賣股票要明白『該買則買、該放則放』，如同跳舞時需知道幾時要出右腳，幾時要出左腳，出錯腳就會踩倒人。」勢估唔到呢位名師演講前會先跳番Part舞，嚇得孖妹目瞪口呆，之後先同其他聽眾一樣，隨音樂節奏拍掌，場面簡直似睇緊演唱會。
與別不同嘅開場非常配合呢位名師，佢最神奇嘅事迹係33歲時已當上美林證券第一位華人副總裁，佢當年隻身到華爾街時，口袋只有27美元，一年間就賺得名車和山頂上嘅豪宅，佢形容「當時要『Benz』兩星期就有，要房子三星期就得到」。但胡老師喺八六年放棄高薪厚職，回巢台灣推廣股票投資教育，當年台股只有800點，佢敢言3年內會升上10,000點，就咁樣「一測成名」。
胡老師現職股市評論家，經常穿梭兩岸及美國等地演講，但至今未曾在香港「開壇」講股。今次孖妹都係北上找尋老師蹤迹，講座甫結束，有幸同佢做個獨家專訪，坐定後，胡老師要秘書幫手將藥水滴入喉嚨內，才再接受訪問。
「1/2平均法」準測合理價
莉莉︰胡老師，你把聲冇事嘛？
胡老師︰每次演講後都要滴藥水，喉嚨先會舒服啲，年輕時最勁一日講7場，一年超過1,100場，上午8時至晚上11時連環演講，由台北講到高雄，有人曾邀請我喺台灣小巨蛋搞講座，2萬個座位一定爆滿，不過年紀大喇，唔夠氣演講咁耐。
高妹︰人人稱呼你做「演講天王」，咁你點睇個市？
胡老師︰我一直堅持「二分之一平均法」，由恒指高位嘅一半計算，21,600點係合理價值，再跌一半係非買不可嘅超賣區，但將來跌番落呢個區嘅機會好細，只要恒指喺21,600點樓下都適合買貨。
莉莉︰即係依家買得貨啦，咁之後港股可以升到幾多？
胡老師︰一般嚟講，當股市企喺21,600點嘅合理價位後，預料喺3至6個月內，會有額外20%嘅升幅。但明年輪到「牛市下半場」，唔似今年升勢咁強，一口氣升咗半年，「下半場」要等好耐先會到目標價，板塊移動得好快。明年恒指唔會升得太多，所以炒作唔易，要「選股不選市」。總之恒指一跌落21,600點就買貨，今年底之前非常有可能升到22,000點，但明年去番32,000點高位嘅機會就好細。
「牛市下半場」唔太睇好
高妹︰「牛市下半場」仲要小心啲乜？
胡老師︰「下半場」一般平均歷時兩年，期間資金氾濫，股樓仲會升，各國股市唔會好似「上半場」咁「各走各路」，而會密切「連動」，若任何一個股市「打噴嚏」，全球股市就會「感冒」，所以我唔睇好明年股市，覺得表現仍然係「不死不活、不冷不熱」，未來3年仲係陰天，資產泡沫仍有機會爆破。
莉莉︰我哋幾時先可以見到太陽？
胡老師︰我長時間研究全球新興市場，若要股市重拾健康嘅上升軌，除非普遍新興市場一年嘅銀行定存息率回復4厘嘅正常水平，資金重返銀行，市場唔會亂炒，到時就可以「見到太陽，見到胡立陽」……呢句講吓笑啫。
莉莉︰咁明年應該揀邊類股票？
胡老師︰港股嘅「主菜」始終離唔開金融及地產股，再配合「配菜」——食品及科技股都唔錯。
「3日原則」大賺小賠
高妹︰呢幾類板塊中，有乜嘢值得推介嘅愛股？
胡老師︰我多數「測市不測股」，預測股價實在太大壓力，總之要揀就揀板塊中最強嘅「明星股」（龍頭股），據統計，無論喺乜嘢價位買入，真正嘅強勢股喺3日內就會賺到錢，3個月已經係好長線。若發現3日內股票仍住在「套房」，就要試試其他股票，呢個係我自創嘅「3日原則」。
莉莉︰咁投資法都「好唔正常」，係咪要咁「Crazy」先可以贏錢？
胡老師︰「正常人」鍾意跟股票談戀愛，將短線當長線咁玩，所以通常「一買就套」，要贏錢就要做個「唔正常」嘅投資者，聽股票說話，如果股票連跌3日，表示已經「生病」，就要急急套現。仲有一招，就係要學識「進三退一」， 上設30%止賺，下設10%止蝕，邊個價位先到都要先賣掉，做到大賺小賠，安心睡大覺。
A股「歌聲魅影」隨時插
高妹︰點解你估市咁準？
胡老師︰我從華爾街返嚟後，就冇買過股票，只要「手中冇股」，就可以保持客觀態度。投資者成日喺「岸邊看海」，我就喺「飛機上看」，睇市睇得準好多。
莉莉︰今年你覺得邊個股市最好玩？
胡老師︰今年深深愛上巴西股市，正如森巴音樂，有秩序地高低高低，低就買高就沽，穩陣地賺幾轉錢。至於A股就好似「歌聲魅影」，有時會出現嚇人嘅低潮，但最終音樂會升到高潮，股市一定會升。
46%散戶炒新股有賺
跳舞除咗可強身健體外，亦都可以好似草蜢咁唱「一起森巴舞，撥走不滿，發洩發洩你苦悶」。仲有4日就度過○九年，趁歲晚暫時忘記新股「潛水」、豬流感、「2012」末世預言等，同其他股友發吓牙痕，講番自己今年嘅新股投資成績，據今期《東方產經》網上民意調查，截至上周末晚上6時，話今年投資新股賺5,000元或以上及賺5,000元以下分別有37.8%及8.1%，但20.9%及9.5%就唔好彩，分別蝕5,000元或以上及蝕少過5,000元，而23.7%就無投資新股。
莉莉、高妹
若有料報畀高妹同莉莉或有嘢問，可電郵money.biz@opg.com.hk