「中國用戶滿意鼎」

根據太保提供嘅資料，呢個「鼎」好有來頭，話說中國質量協會喺○五年三月底，送咗個內地金融行業「中國用戶滿意鼎」第一鼎畀太保嘅，褒獎公司喺實施全國用戶滿意工程方面取得嘅卓越成就。呢個「鼎」係由清華大學美術學院參照西周時期，即係公元前一○二七年至公元前七七一年，其中最經典嘅圓形鼎設計而成。

咁珍貴嘅禮物佢哋一直保管住，今次送畀港交所嘅鼎係複製品，但據絲絲參觀港交所嘅經驗，好似都有唔少公司送鼎畀港交所，呢件禮物喺新意上可能欠奉，不過對於公司嚟講就幾貼切，保險公司最緊要講個信字，話賠就賠，一言九鼎至可以得到人哋嘅信任。

余絲韻