本文重點
Facebook嘅影響力無遠弗屆，絲絲都有幾百個「朋友」，而玩開FB嘅人都知，牽繫全球除咗靠minigame，各類群組亦好幫得手。明星、名牌等群組可謂司空見慣，但本港上市公司都有群組就認真少見，原來新世界發展（00017）都「潮」得起，喺FB成立咗集團專頁，以文字、相片等形式與大眾分享集團最新資訊，好似佢哋贊助嘅大專生汶川交流團、義工活動等，資料更新幾有效率。
拓溝通渠道夠明智
呢個群組啱啱開始冇耐，成員尚未過百，但若然集團員工齊撐場，加上佢哋嘅業務涉及衣食住行，話唔定睇完絲絲嘅介紹，人數隨時可以翻幾番，若股價跟隨人數升勢，股東嘅聖誕願望就實現可期。眾所周知，新世界除咗物業業務外，仲涉足電訊、媒體等範疇，百足咁多爪，開拓溝通渠道認真是明智之舉，加上「彤叔」追隨者眾，散戶都以佢馬首是瞻抽新股，如果佢本人都喺FB建立粉絲團，相信好多人會爭相加入。
余絲韻