本文重點
如果你喺暑假期間嘅七、八月生日，細個時會唔會少咗班同學仔同你一齊慶祝？輝立商品（香港）董事劉叔同（Alton）喺八月生日，細個時未試過喺學校慶祝，Alton記得讀小學時，甚至有一年佢同家人都差啲唔記得自己生日，直至夜晚先醒起，結果爹哋媽咪就畀咗幾蚊佢落街買雪糕食。雖然冇生日蛋糕，但有「生日雪糕」都唔錯喇。
睇秘笈學分配股債
Alton讀理科，對數學特別有天分，之後更到英國升讀大學，並喺劍橋修讀財務碩士。睇書係佢嘅一大興趣，特別係有關投資、管理及人生哲理嘅書，佢就首推「股神」巴菲特嘅師傅、「價值投資之父」葛拉罕（Benjamin Graham）嘅《The Intelligent Investor》，話大家可參考吓當中嘅資產配置觀點，就係無論投資市場有幾好或幾壞，一個股票及債券混合嘅投資組合，股債任何一方都唔應該多過75%或少過25%，咁樣先可以減低組合嘅風險及爭取較穩定回報。坐言起行，Alton依家嘅強積金組合都是75%股票、25%債券呢！
余絲韻