楊玳詩「升呢」當副主席

證券商協會主席任期一般係一年，但可以再選連任，最長做3年。現任主席林建興由於太忙，所以唔再重選，結果現任副主席之一嘅蔡思聰，喺全票贊成下，當選新一屆主席。至於楊玳詩依家已經係證券商協會董事，所以今次升做副主席，可謂更上一層樓。

證券商協會副主席及永遠名譽會長李君豪就大讚Daisy（楊玳詩洋名），話佢一直好支持證券商協會，出錢又出力，亦好支持業界。

蔡陳葆心一直係證券商協會嘅靈魂人物之一，絲絲暫時未知佢哋幾時會舉行新一屆就職典禮，但明年一月已先有大搞作。話說港交所（00388）行政總裁周文耀喺明年一月十五日榮休，蔡太早前透露話，已暫定明年一月十二日喺中環大會堂，聯合其他4個證券組織（證券學會、證券及期貨業職工會、網上經紀協會、專業財經分析及評論家協會）為周文耀餞別，初步預計會筵開幾十圍；至於喺一月十三日就輪到證券業協會為周文耀設宴。咁多人要同周文耀食飯，睇怕絲絲與行家想同佢farewell，要有排等喇！

余絲韻