恒指開波微升24點，早段乏力上，上半場更曾倒跌，幸而午後祖國魚缸升幅擴大，本地魚缸亦反覆向上，最終恒指收報21,328點，升236點；國企指數則升或178點，收報12,528點。不過，聖誕假期逼近，成交進一步縮水至只有441億元，今日下半場休市，相信成交縮水幅度更驚人。古勝執筆時，歐洲魚缸繼續向上，估計在年結前後，各地魚缸即使唔再向上突破，跌勢料告一段落。

恒指暫在二萬一點水平靠穩，不過成交唔配合，在下唔敢肯定本地魚缸已脫離危險期。況且祖國魚缸弱勢已成，尋日反彈亦唔見得好有力，近年紅色分子在恒指成分股的地盤不斷擴大，一旦祖國魚缸有乜冬瓜豆腐，本地魚缸亦難獨善其身。

買大象等明年拆禮物

今年「聖誕鐘、買滙豐」似乎未有好好發揮，不過古勝則認為看官不妨把握機會，買定大笨象過聖誕。尋日「法包」吹出報告表示，根據往績紀錄，聖誕前買大笨象，到一年後拆禮物，梗唔會令人失望。大笨象一○年預測市帳率1.3倍，可以話相當超值，該行維持其「買入」評級，目標價114.58元。昨日大笨象回升0.7%至87.8元，較「法包」目標價有三成上升空間。

至於昨日冧把溫大隻佬係富士康（02038），多得「你戇」唱好，昨日股價升7.5%，收報8.51元。紅色錢莊跟保險股亦見反彈，除中行（03988）升逾2%外，其餘升幅不足2%，財險（02328）跟平保（02318）更連1%都升唔到。

本地魚缸彈力有限，可以話係重量級祖國移動（00941）逆市下跌累事，股價跌0.3%至69.6元，祖國電信（00728）跟二奶電話（00762）則分別升1.2%及1.7%。

雖然上海地皮又以破紀錄價格成交，但紅色地主維持弱勢，皆因北大人連環出招，未能擺脫政策風險，龍頭中國海外（00688）逆市跌0.7%。不過，其他地主卻開始反彈，好似聯手投得廣州地皮的富力（02777）、雅居樂（03383）及碧桂園（02007），投地資金攤分，料對佢哋唔會構成財政壓力，投地對三者中長線發展均屬有利。古勝講過紅色地主長遠肯定贏大鑊，看官應趁家陣調整買平貨。

售樓利潤極為可觀

中渝置地（01224）今年高位6.6元，現價3.7元幾乎無咗一半，睇番其售樓成績，截至今年十一月的累計銷售達16億元人仔，較○八年合約銷售額增加2.5倍，銷售總樓面面積約為28萬平方米，預期明年的合約銷售目標最少達30億元，呢一堆實際成績，都支持股價企穩在3元之上。

集團預計，一○年的合約銷售目標最少為30億元，較○九年經修訂目標再增加1.5倍。中渝大部分土儲在重慶及成都，係當地的大地主，擁有土儲達1,330萬平方米，其中60%位於重慶市，30%位於成都市，足夠未來5至6年發展之用。至於呢批土儲的成本亦平到笑，平均每平方米只有1,100元人仔，未來售樓利潤極之可觀。

中渝曾在七月時以每股5.92元批盪4.28億股，淨集資24.78億元，料未來一兩年唔會有乜財務壓力。基金接近六皮接貨，現價平咗三成幾，斷估班芬佬唔係傻，肯用咁高價接貨，中渝未來應大有錢途。

古勝