本文重點
今個聖誕節唔少商場落足本搞宣傳，海港城助理總經理（租務）李麗儀同Vincent講，尖沙咀海港城今個聖誕斥1,300萬元宣傳，其中650萬元用喺海運大廈露天廣場嘅布置。佢預計今日同除夕當日，單日人流逾33萬，比舊年多一成，目前旅客佔人流約30%，本月營業額料有雙位數增長。
佢又話，第四季海港城生意不俗，十月及十一月營業額錄13億及近14億元，合共較舊年升逾三成，料全年營業額突破舊年嘅134億元，並有雙位數增長。至於近日廣東道有舖王誕生，佢話有投資者睇好該地段表示高興。
300代理舖升呢獲獎
地產代理監管局一向重視提升業界質素，而地產代理經過多年發展，亦不斷走向專業化，地監局昨公布頒發二○○九年「地產代理商舖專業進修嘉許獎章」予300間代理商舖，表揚有關商舖嘅地產代理從業員積極參與持續專業進修活動，而今年數字亦比舊年飆升74%。
該嘉許獎章標誌可以在明年於店內張貼，並可加入發出的文件及員工名片上；不過Vincent知道，二○一一年及之後嘅商舖嘉許獎章門檻，會由現時每間商舖五成營業員達到12個進修學分，調升到要有八成營業員達到要求學分才能攞到獎章。