本文重點
去年金融海嘯害到香港銀行雞毛鴨血，間間銀行嘅大班都要打醒十二分精神，所以去年聖誕有假都唔係好敢放，但今年就唔同，市況漸趨穩定，「賓卡」們應該有心情放番個輕鬆假期。
好似渣打香港嘅CEO洪丕正（阿Ben），尋日出席完今年最後一場傳媒活動後，佢今日就會同家人飛去日本北海道過白色聖誕，去足一個禮拜，滑吓雪食吓嘢。
北海道滑雪歎美食
佢好謙虛咁話，由於自己身形頗高，講到滑雪並唔係高手。有咁多地方可以滑雪，點解偏偏要揀北海道？阿Ben話因為阿爾卑斯山及加拿大嘅雪近年都唔係好穩定，而北海道嘅雪就比較優質，加上日本嘢好食，故揀去日本。
阿Ben又好開心咁同絲絲講，話渣打股份喺香港嘅交投量升咗好多，今年比去年足足多咗成10倍，佢解釋話因為渣打過去一年多咗人認識，好多流入亞洲嘅外資基金買賣渣打，當然亦都多咗散戶捧場。
余絲韻