老詹今次與太太及一班親戚到賭城，諗住逗留兩個多禮拜，明年一月三日至返港，今次佢主要目的之一係參觀吓MGM新興建嘅賭場及酒店，呢個新建築群據聞斥資85億美元興建，令佢眼界大開。

住萬呎靚房 仲有排玩

今次佢會分別住3間唔同嘅酒店，其中有間酒店嘅房間面積大到逾一萬呎，絲絲好想知，成萬呎嘅酒店房每晚房租要幾多錢？點知佢話想租都冇得租，因為要係賭場賓客至有得住。

身為賭場VIP，咁賭場會唔會包架私人飛機嚟香港接佢去賭城呀？佢話一般嚟講，如果747飛機可以由香港直飛賭城，但如果係737飛機，就要喺東京停一停加油，佢因為唔想停東京，於是自己坐飛機去三藩市，再由賭場派專機嚟接佢去賭城。

佢逗留賭城已近一個禮拜，有冇斬獲？老詹嘅牙擦本性又返嚟，話到依家已贏咗過百萬美金，折番港紙即係成千萬。但由於仲有成10日住喺賭城，未知最後埋單結果。

今次老詹喺賭城真係不愁寂寞，因為張華峰咁啱又喺嗰度玩，但今日就會返香港。

余絲韻