21/12/2009

播放本新聞相關短片
查詢股票編號

iBank新鮮人:末日心態部署投資

今日係二○○九年十二月二十一日,咁請問3年後嘅今日會發生乜嘢事?二○一二年十二月二十一日係世界末日嘅「末日預言」又被翻炒,就試吓以末日心態諗吓點投資。

呢個「末日預言」幾十年來有唔少人去研究。長話短說,話說古代瑪雅文明有一種曆法叫「長曆」,一個完整周期相等於陽曆約5,215.36年,目前周期的完結日換算陽曆剛好係二○一二年十二月二十一日。

多方「引證」末日論

之後又有唔少人加埋其他唔同來源嘅預言去「引證」呢個末日論,連科學家都幫埋手。有科學研究指出,地球磁場於過去幾十年漸漸減弱,到二○一二年仲會發生「地磁倒轉」現象,即地球磁場會倒轉,指南針同候鳥都會分唔到方向,但實際有幾大影響就無人知,因為以前無發生過。近年連美國太空總署都預告,二○一二年底地球會受到「太陽黑子」影響,到時地球上所有電子儀器有可能同時失靈。

有無「末日預言」都好,氣候反常,近年天災頻頻,連「金融海嘯」都有,我哋亦可以預計到未來幾年會有翻天覆地嘅變化。氣候問題自然係一大關注,我哋好留意金價創新高,但忽略咗軟商品嘅農作物。例如可可豆價格早前升上36年來新高,因為受厄爾尼諾現象等氣候變化影響,失收自然推升價格。總之,氣候反常,農作物失收會係未來幾年嘅投資題材。

新能源繼續成焦點

另外,即使哥本哈根氣候峰會無成果,「減排」都會繼續係環球議題,「碳排放權」會愈來愈搶手。希望有金融機構將碳排放交易零售化,但入貨前麻煩你自己了解清楚先。仲有,你都知新能源亦會係另一題材,不過如何發掘明日之星,我自認無能為力,惟望有基金經理効勞。

3年或者太耐,不如講3日。今個星期得3日半市,資金流走睇怕仍然係炒作藉口。睇遠少少,未來第一季,恒指已經失守100天線,二來「複式頭肩頂」頸線似乎都快將守唔住,今次或者要調整到19,000點左右。

大健