本文重點
金融界一向才俊多，不過講到鑽石王老五，就真係買少見少，花旗香港揸旗人盧韋柏（Weber）喺剛過去周日亦正式告別單身行列，同女朋友拉埋天窗，認真要恭喜恭喜！
才俊「筍盤」又少件
Weber一向官仔骨骨，而且咁後生已經做到咁好成績，相信一眾港女都會認同，本來單身嘅佢絕對係一個「筍盤」，聽講盧太都係金融界中人，正所謂近水樓台先得月，確係門當戶對！
Weber講過，從來開會時間都唔會定喺夜晚7點後，又話有工作都要維持均衡生活，日做夜做唔代表成功，相信太太聽到都會好開心，因為自己老公咁懂得生活之道，唔會係個工作狂咁悶蛋。
話時話，今年好年真係宜嫁娶，賓卡圈都唔單止Weber一個娶老婆，好似六月就有恒生（00011）總經理馮孝忠小登科，數下數下，銀行界鑽石王老五真係冇乜點剩，算係半個賓卡嘅金管局副總裁余偉文，睇嚟已經係稀有「筍盤」。
余絲韻