本文重點
漫畫大師手塚治虫嘅經典作《小飛俠》曾風靡全球，但靠呢個名賺錢再唔係必然，電影《阿童木》票房慘淡，就連日本票房都麻麻，拖累製作公司意馬國際（00585）股價一直沉底，尋日又跌1.1仙，收報9.9仙，相距起飛之日似乎遙遙無期。佢哋喺上周已裁走100名員工，節省公司成本。
搵「實Q」請記者離場
尋日意馬召開特別股東會，管理層仲玩埋「潛水」，工作人員話佢哋唔見記者，又話前台範圍人來人往，記者不宜久留。一眾記者飽食閉門羹，惟有行出辦公室門口靜待，誰知唔夠5分鐘，護衞哥哥就埋嚟請記者離去，佢哋都係奉命行事，大家亦無再糾纏，不過有樣嘢絲絲就百思不得其解，記者只係揸筆，又唔係揸槍，公司有冇必要召喚警衞？套戲唔收得要蝕錢已成事實，做得上市公司，就預咗要面對群眾。意馬依家仲搞緊同樣係改編自日本漫畫《神勇飛鷹俠》嘅動畫電影，又聽聞意馬打算開拍《阿童木》續集，祝佢好運。
余絲韻