本文重點
踏入十二月份，樓市又再生猛番，除咗本地買家入市態度轉趨積極之外，內地資金持續湧入本港，亦係催旺樓市嘅重要原由，地產代理老友同Vincent講，除咗天價豪宅受到內地買家追捧之外，唔少內地人士都喜歡掃新界區細價屋苑，好似最近一名來自廣州嘅內地客，就以約365萬元連掃咗3個天水圍嘉湖山莊面積576方呎單位，呎價介乎2,066至2,135元，據聞，買家仲諗住再買多2至3伙，以合乎投資移民限額資金要求。
據Vincent所知，其他區域都有內地買家入市個案，好似天水圍天頌苑E座高層5室，就由一內地移民人士「即睇即買」，成交價142.5萬元。而另一名內地投資移民人士睇樓一周後，亦以410萬元買入紅磡海濱南岸1座高層F室，呎價7,335元。
澳門中小樓癲過香港
今年香港中小型住宅樓價閒閒地都升咗兩、三成，但原來澳門升得仲癲，升幅超過四成。仲量聯行大珠江三角洲研究部主管陳錦平話，澳門政府喺第二季頒布按揭保證等利好樓市計劃之後，刺激全年當地中小型住宅樓價勁升42.5%，豪宅亦有21.9%增長。澳門今年有唔少新項目嘅樓價都升得好急，好似澳門凱旋門今年呎價比舊年就升咗足足六成去到4,800元。至於出年澳門樓市展望，佢就估計中小型住宅同豪宅有10%同5%升幅。
（Vincent Lau）