本文重點
股市有所謂「名牌效應」，工業股嘉瑞國際（00822）尋日宣布委任現任瑞銀外部顧問嘅明星分析員陸東做獨立非執董，話說另一隻華保亞洲（00810）今年中喺陸東入股兼擔任顧問後兩日內勁升兩成，莫非陸東今次再化身「香港股神」嚟個「點石成金」？
點石成金有前科
嘉瑞喺尋日收市後出咗份公告，正式委任陸東做非執董，每年15萬元董事袍金唔算多，佢仲持有嘉瑞700萬股，即時令絲絲諗起另一隻做投資控股嘅華保亞洲，喺今年六月宣布委任陸東做顧問兼入股後勁升兩成，難免令人有啲遐想喎！
不過，嘉瑞副主席姜永正就同絲絲講，話今次搵陸東幫手嘅目的完全係因為對公司營運嘅幫助，佢仲話與公司主席李遠發去年喺一啲生意朋友介紹下認識陸東，咁啱佢哋以前一路都有留意陸東寫嘅報告及講座，覺得佢喺投資方面好有眼光，加上係投行出身，無論喺資本市場運作及公司形象方面都可以幫到公司，於是就決定搵佢幫手喎。
余絲韻