本文重點
滙源果汁（01886）雖然與可口可樂聯婚失敗，不過呢位「果汁一姐」又被傳有新姻緣，今次嘅對象唔係鬼佬，而係來自台灣嘅統一，呢個消息早前已經被公司否認，之不過喺呢個敏感時刻，統一前高管李文杰加入滙源，做董事長兼總裁朱新禮嘅特別助理，就令市場人士揣測咁樣嘅安排，係咪代表咗雙方會進一步合作甚至購併。
統一前高管早有淵源
滙源真係皇帝女唔憂嫁，自從去年獲可口可樂提親後，前幾日又有報道指統一有意增持甚至購併滙源。
今次朱總嘅新助手李文杰來自統一，轉職前係統一北京總經理，所以市場又傳聞李文杰加盟，係為咗統一與滙源進一步合作鋪路。滙源方面就否認呢個講法，話李文杰經已向統一請辭，今次係以私人身份入職。
朱總與李文杰嘅淵源可追溯至○五年，當時滙源與統一首次合作喺海外成立公司，李文杰被派往滙源總部，喺○五至○六年專責滙源營銷，當時與朱總共事咗一年。
余絲韻