17/12/2009

播放本新聞相關短片
查詢股票編號

絲絲講場:俄鋁財主港衝關

臨近歲晚,雖然啲基金都埋緊數等收爐,但係仲有新股趕緊喺年尾前進行港交所(00388)上市聆訊,今日就有俄鋁同埋已經喺加拿大上咗市嘅煤礦公司南戈壁「闖關」。

倘過關下月初招股

話說今日已經係俄鋁第3次闖關,據江湖傳聞,俄鋁大股東兼曾經係俄羅斯首富嘅Oleg Deripaska喺本月七日第2次「闖關」失敗後,曾經秘密親自飛嚟香港與港交所「溝通」,雖然依家相信佢已經離港,不過近日俄鋁又派咗另一位管理層來港,似乎要做足準備,勢必要「闖關」成功咁話。

絲絲聽聞,港交所上市委員會及證監會都好緊張今次俄鋁上市,問題一大籮自然不在話下,咁又係嘅,香港去年因為雷曼迷債事件,負上沉重代價,監管機構唔敢輕易通過亦都可以理解。

之不過,一向好想拉攏外國大型企業來港上市嘅政府又點睇呢?俄鋁上周突然宣布委任梁愛詩及張震遠出任獨立非執行董事,搵到與政府關係咁密切嘅人士入局,政府想唔想俄鋁上市,都好明顯啦!

據外電報道,俄鋁今日如果過到聆訊,明年一月初就會即刻展開推介以及招股程序。年底基金埋數,連帶資金都少咗,俄鋁年頭招股,到時就可以搶飲頭啖湯。

余絲韻