近期恒指表現弱過沙煲，雖然股仔仲係炒緊個別，但大市陰陰咁跌，始終不利市場氣氛，每當期指一急跌，個個炒友就率先掟貨，搞到啲股仔走勢都幾怪異吓。如果大市真係太高頂唔順，不如痛痛快快大跌一場仲好過。
現時市況都幾難玩，話個市會死又唔似，但入咗市又不停咁嚇你，唔通真係要提早放假。內地天然氣提晒價，啲燃氣股自然可以睇高一線，而且市場傳燃氣改革方案明年初會登場，所以古晨覺得燃氣股有得諗。
港華燃氣（01083）一向炒味唔濃，加上有母公司煤氣（00003）支持，在內地發展相當不俗，近期又剛新增咗四個管道燃氣項目，燃氣股中算是較穩健之選，其股價自十月大炒過後呈現大型三角形收集，3元有強大支持，尋日初見突破，穩陣股唔怕追，向上睇4.5元，止蝕位可考慮2.8元。
古晨