絕大部分香港人都估唔到香港足球隊贏，其實球員於整個賽事的付出真係值得全場雷動掌聲，喺四強同決賽都係打足九十分鐘連加時，射埋十二碼先分勝負，一次又一次憑意志同信念闖關。

踏入十二月後，港股唔上唔落，恒指徘徘徊徊。唔好以為今年又可以提早放假，未來幾個星期隨時決定下年市況，因為杜拜債務危機未正式解除，最怕不時被拿來做衝擊本港上市國際銀行股的藉口。仲有，要睇實歐洲國家債務情況，上周希臘同西班牙已經被調低債務評級，要留意有無新消息。

美議息後市關鍵

另外，今個星期美國聯儲局議息，息口應該唔會變，維持低息環境，但會後聲明一定係後市關鍵。美國零售銷情最終係咪會如同感恩節後市場預期咁差呢？

如果睇圖，恒指已經出現一浪低過一浪走勢，難防有暗湧。我成日話會睇50天平均線行事，但近期恒指再次喺50天平均線徘徊，我惟有照跟，總之升穿買貨，跌穿沽貨，既然決定用這個方法，就要堅持到底，年結再檢討成敗。

其實大部分人炒股都係輸在左搖右擺，另外一部分人則輸在一成不變，只有少數能在堅持信念和隨機應變找到平衡的股友成為贏家。炒股跟踢波一樣，要懂得靈活走位，又要對自己作出的決定有信心，不能有一刻鬆懈。

入到投行工作，更明白不能有一刻鬆懈的重要（當然係犯過錯先咁深刻！）努力之外亦要有「腦力」。上期《經濟學人》引述調查機構Gartner預測，○九年全球IT開支約24,840億美元，當中金融界有5,030億美元，即係佔20%，係最高開支的行業。明白點解我成日叫你唔好同大行硬碰喇。

大健