領團來港掃樓成佳話
每個成功人士背後總有一個魔幻嘅故事，而邱永漢嘅故事可以用「神奇」來形容，因為他人生中的第一桶金竟然係靠一支筆而賺得。一九五四年他與妻子移居日本，為咗生計而當起投資作家，利用一年時間鑽研投資知識，及後成功喺《周刊朝日》撰寫投資專欄，每隻出自他手筆嘅股票都必定大升，所以日本民眾就稱他為「賺錢之神」和「股票神仙」。
不過，講到邱永漢嘅威水史，就一定要數八九年香港股市、樓市跌至谷底那一役，當年他帶領日本投資者一口氣買入650個太古城單位，並於九七年七月樓市高峰期全部沽出，獲利三倍之多，為其人生寫下光輝一頁。轉眼20年，邱永漢至今仍然不言休，每兩、三個月就帶領日本投資團到東南亞及內地城市做實地考察，平均每3天坐一次飛機，他笑言：「既然我死唔去，惟有繼續工作啦。」
畀貼士吼民營內需股
高妹： 你叫做「賺錢之神」，點解你每次揀嘅股票都會大升咁神奇？
邱： 因為我買嘅都係「成長股」（或稱增長股），以人的年歲計算，成長股大約係18、19歲，正值發育時期，代表這些股票嘅增長潛力十分高，現時中國嘅民營內需股就係其中的板塊。
莉莉： 原來股票都有分「後生唔後生」，哈哈，咁有咩股票已經變咗老人家啦？
邱： 龍頭股，經過一段增長時間，這些大型上市公司已經變成第一流嘅股票，年齡都有五、六十歲了，股價會比較穩定，好難會再出現暴升現象。所以買股票的話，不論你投資哪個地方，都一定要買些將來有增長潛力嘅股票。
高妹： 你成日帶團返中國大陸做考察，自己又長居日本，你點睇未來兩國嘅經濟發展？
邱： 短期內，日本經濟要轉好並唔容易，其中一個原因係日本政府官員年輕，對經濟狀況唔了解。至於中國內地，今年推行房地產和汽車措施適合，「保八」成功，但我認為明年中央政府應會改變策略，把焦點一半放喺公共投資方面，另一半則繼續會放喺樓市及汽車上。
高妹： 你喺香港住過6年，仲寫咗本令你一炮而紅嘅書《香港》，咁你覺得日本人同香港人喺投資上有乜分別？
邱： 香港人很會賺錢，所以多數走短線投資；但日本人比較重視未來，做每件事都好小心謹慎，投資傾向長線，兩地人喺投資方面嘅想法很不一樣。
著作無數 股神係行家
莉莉： 難得見你一面，老土少少都要問吓，點解你咁識投資賺錢，係咪有乜嘢驚人絕招？
邱： 哈哈，你哋睇我啲書就會知道，我有寫嘅。
高妹： 我哋知道你已經出咗450本書咁多，可惜我哋一本都買唔到，好多間書局都話賣晒。
莉莉： 近10年環球金融市場有好多「股神」出現，好似為人熟悉嘅巴菲特，你對這些「股神」有乜睇法呢？
邱： 無乜睇法呀，我咪當佢哋係行家囉。
高妹： 你真係好有幽默感呀。其實你都85歲啦，但身體都仲咁健康，你有乜嘢養生之道呢？
邱： 我無乜特別嘅養生之道。你見我咁瘦，係因為我要解決嘅事情有很多，煩惱都有好多，哈哈。
轉眼間，天已放晴，孖妹與邱永漢嘅訪問亦已完成。雖然我哋唔知道呢位叱咤金融市場半世紀嘅「賺錢之神」何時會重臨香江，不過假如各位股友將來有日，喺中環街頭遇見一位英氣十足、雙目炯炯有神嘅老伯，佢神態輕鬆咁帶領走在最前，後面仲有一大群日本人跟住，其中一人手上更高舉「香港邱友會」，咁孖妹就恭喜你，因為「賺錢之神」出現喇，你嘅好運兼財運自會來臨。
下期聖誕老人會股友
講番香港市場，近期新股一浪接一浪，太平洋保險（02601）將於明日截止招股，係今年本港集資額第二大嘅新股，唔知各位股友會唔會抽番一、兩手呢？據東方產經網上民調截至上周六下午6時嘅結果顯示，有38.2%股友話「會」，61.8%股友話「唔會」。最後，一年一度嘅聖誕節就快到，相信各位股友已準備咗唔少好節目，孖妹今年就約咗聖誕老人見面，如果大家想知道有乜嘢事發生，一定要留意下期嘅聖誕版「孖妹缸湖遊」喇！
邱永漢小檔案
年齡：85歲（1924年3月28日出生）
學歷：日本東京帝國大學經濟系畢業
能操語言： 日語、普通話、廣東話、台語
家庭狀況： 已婚，其妻子為「潘高壽川貝枇杷露」太子女潘苑蘭
個人榮譽： 1956年憑原創小說《香港》榮獲日本大眾文學最高殊榮「直木獎」
莉莉、高妹
若有料報畀高妹同莉莉或有嘢問，可電郵money.biz@opg.com.hk