港匯上星期腳軟，有缸邊友擔心資金流走，古勝卻不以為然，美元反彈，港匯自然腳軟，但唔代表有資金大量流走。反而花旗經濟好轉，美元扭轉弱勢，花旗魚缸亦能上升，兩者未必要繼續背馳，眼見本地魚缸近日下跌，恒指多次考驗保力加通道底部過關，每次均見反彈，恒指反而在21,000至21,200築底，看官不妨以此作參考為入貨區域。

本地魚缸上周對比亞太區內其他魚缸確係弱咗些少，令唔少缸邊友開始對後市信心動搖，古勝反視之為魚缸見底的訊號。過去試過無數次，魚缸大開車前，必先在某水平唔上唔落，令人心惶惶，計數跳車離場，大戶卻藉此機會密密收集，待時機成熟即大踏油門開快車入直路。古勝相信聖誕過後，魚缸或出現另一番景象，唔想上唔到車，有優質股份在手，不妨按兵不動，無謂受短期震盪影響，下錯落車決定。

鋼鐵板塊周末前成為魚缸焦點，寶鋼集團公布明年一月價格政策，包括冷軋、熱軋在內的主流產品出廠價全線上調，刺激鋼鐵股落鑊熱炒。重慶鋼鐵（01053）估值一向偏低，上周五發力急升近9%，報收3.16元，成交增加配合升勢，新一輪升浪已展開。

受惠造船業復甦

重鋼為西南部最大鋼鐵生產商，受惠於該地區供應短缺，加上地區政府關閉產能落後的鋼鐵廠，重鋼或透過購併提高產能。集團新生產線將每年生產330萬噸寬鋼板以及熱軋鋼，預期一○年銷售將增加71%，盈利亦可在未來兩年分別增加291%及34%。鋼板業務佔重鋼產量逾40%，份成績表好唔好睇，取決於造船業的復甦情況。波羅的海指數自今年初起已累積彈升3倍，業內最壞情況已過，十月份祖國市場佔全球新定單及未完成定單分別67%及38%，所佔比率全球最高，作為專營造船鋼板的生產商，重鋼料可受惠。至於型材、線材及鋼坯的產量，分別佔25%、13%及10%，加上今年第四季鋼鐵價格偏穩，預期重鋼期內業績應可大有改善。

古勝