本文重點
新股趕上市忙中有錯，搞到要去公司註冊處再註冊過，又要回收印錯嘅招股書，真係費時失事！邊間公司咁唔小心？咪就係尋日開始招股嘅摩比發展（00947）囉。
內容改動 要再註冊
不過，好在印錯嘅招股書喺派畀公眾之前已發現出錯，工作人員即時收回無流出街，所以投資者請放心，你哋攞到嘅招股書，入面嘅資料完全正確。
話說摩比集資淨額係5.103億元，英文係「510.3 million」，但翻譯招股書時出錯，將數額寫成510.3億元，公司發現後，開通宵改過個集資額，而銀行喺尋日朝早派發之前亦再Check多一次，確保印錯嘅招股書無流出市面。不過，尋日公司要攞本招股書去公司註冊處再註冊過，因為招股書內容有改動。
余絲韻