絲絲覺得今年都算係銀行界最多重臣退休嘅一年，繼金管局前總裁任志剛退休後，老臣子YK亦就嚟退休，尋日佢最後一次出席銀行公會例會，銀公主席王冬勝（Peter）話同YK合作咁多年真係好開心，佢退休後可做自己鍾意做嘅嘢，預祝佢退休生活愉快。

銀監老手緊貼潮流

YK聽到Peter咁講，即刻用「潮」語回應，形容自己退休係「升呢」。絲絲真係佩服YK，佢不愧係銀行監管35年嘅老手，認真緊貼前線及潮流。佢亦話好多謝銀公及新聞界對金管局合作嘅支持。

絲絲諗深一層，其實銀行界高層退休真係「升呢」，就以恒生前大班柯清輝為例，退咗休再出山，過千萬年薪加上億億聲嘅認股權證，搵真銀嘅力量絕對不容睇小，莫講話YK仲要係監管高層，不過佢任職監管機構咁耐，點都要過吓冷河抖抖先。

佢早前同絲絲講，退休後會讀吓書，仲要係讀歷史，唔知佢做番學生哥之前，會唔會學吓佢前老闆，退休後去吓旅行，開個網站同大家分享觀點，咁普羅大眾就有福喇。

余絲韻