子女團聚 為兄祝壽

Luzia今年初過檔國衞保險出任首席退休及企業保險總監，有一仔一女嘅佢大呻好忙，話好耐無見過對仔女，以前都有個女喺香港陪佢，但囡囡今年開始轉去美國讀書，個仔就喺英國讀書。Luzia話要親自去探佢哋嘅話，同環繞地球一圈無分別！

不過今年聖誕佢就可以無咁辛苦，事關佢已攞咗大假，仲叫埋仔女一齊喺加拿大嗰邊會合，仲話有大搞作！原來Luzia哥哥今年六十大壽，成個家族打算大肆慶祝，到時場面一定好熱鬧！

Luzia仲回憶佢細個嘅趣事，話說係澳門人嘅佢，屋企只得爸爸同幾個哥哥識講葡語，佢哋有時就會用葡語傾偈，聽到佢同媽咪一頭霧水，唔知佢哋係咪特登講秘密呢？

余絲韻