好明顯，七月港股升穿兩萬點後，市場不但有炒股唔炒市的情況，指數升得亦十分有秩序，唔好聽講係「升得慢」。不妨回顧近幾個月浪頂，八月恒指最高升到21,196點，到九月破位去到21,929點行人止步，比對上一次高位只係多733點，到十月份一樣，最叻去到22,620點，比九月高位只係多691點，到十一月份，高位23,099點比上次高位更只多479點，唔似過往，港股突破高位有5%至10%升勢跟尾，今次猶如拉牛上樹一樣，同大市短短時間谷底反彈超過一倍，上市公司盈利復甦有點跟唔上進度之外，大牛龜中國移動（00941）今年大落後都拖累不少，筆者希望慢火煎魚升勢可以持續，咁今年23,500點的目標就可以順利在十二月見到矣。

中移被撳住打

同個對沖基金經理傾開，佢認定中移今年失去動力，完全同中央傾斜嘅電訊政策，㩒住中移比另外兩個3G經營者「上位」有關。筆者同意這是原因的一部分，睇番年初至今中移股價累積跌緊1.5%，係就係肉酸少少，但同行中國聯通（00762）亦唔威得幾多，只係升12.9%，中電信（00728）叻少少，升20.7%，但即使以沽中移，買聯通、中電信作套戥，賺嘅幅度其實一啲都唔吸引。

今年幾隻內地電訊股表現，實在太令人失望，近期幾則消息，市場幾乎完全無反應。中移董事長王建宙，在一個研討會上，預告3G固定投資高峰應在○九年出現，明年有信心回落，亦透露受惠經濟復甦數據使用有明顯改善。另外，聯通剛公布的十月營運數字，3G用戶突破100萬名外，也透露3G的ARPU（每戶每月平均消費）超過100元人民幣，與首三季聯通整體ARPU大約42元人民幣比對，中國3G服務同香港當年推出時唔同，3G在中國的應用成本明顯高於傳統2G，一旦固定投資高峰比市場預期更早完結，電訊商收入可能更早看到復甦。

戴峰修