本文重點
今年七月收購咗Neway Entertainment嘅中星集團（00055）終於有動作，仲係同娛樂事業有關嘅項目，絲絲近日見到Neway太子爺即係中星主席薛嘉麟，佢話啱啱係杭州返嚟，原來係去參與佢哋第一個投資嘅內地電視劇，絲絲以為佢會喺部電視劇粉墨登場，點知佢話淨係去參加新聞發布會。
總投資2000萬
呢套軍事戰爭連續劇叫《大營救》，據講總投資額達2,000萬元人民幣，中星會投資幾多就冇透露。聽個劇名就知係講歷史，係講述一九四四年抗戰期間點樣營救被日軍俘虜嘅美國飛虎隊王牌飛行員卡恩上校嘅故事，主要演員包括憑藉《李小龍傳奇》而受注目嘅陳國坤，佢飾演國民黨軍官一角。
薛嘉麟話套劇會喺雲南取景，絲絲建議佢搵個角色做吓，橫掂佢都好上鏡，甚至乎可搵埋女友諸葛梓岐同埋大哥嘅女友陳法拉合作，一定可以收到宣傳之效啦。
余絲韻