奪8個獨家經銷權

銀基咁有雄心壯志，皆因眼見內地葡萄酒年消費量增長速度驚人，索性進軍埋內地紅酒市場，而且仲相當快手，已攞到8家外國紅酒供應商嘅獨家經銷權，將來更打算引進超過11個國家21家供應商，約200多個種類嘅海外品牌紅酒，當中包括獨家代理產品40個、自有品牌7個及代理品牌160個。銀基今次打破傳統擴展新業務，所以決定用新模式做推廣，唔單止成立「銀基形象店」提供一站式銷售，仲會用最新嘅3D立體視像設備推廣產品。

絲絲因有工作在身，未有機會試勻全場靚酒，但就「八」到原來全場最貴嗰幾支紅酒，係四九年嘅Lafite及六四年嘅Petrus，每支市價分分鐘要成8萬至12萬蚊，計落場內有過百種紅酒試飲，今次試酒會應該至少耗費百萬大元，加上有十幾個靚女模特兒負責介紹紅酒，唔怪得尋日試飲會有過百嘉賓畀面到場。

余絲韻