一眾炒友連炒個幾禮拜，終於炒到去23,000點，升咗咁多回番少少都算正常，其實由禮拜一起，市場嘅炒味已經開始有所減退，不過啲股份回吐幅度就唔算深，只係大家停停手抖抖氣，相信大漲小回嘅格局仲未完。
大價股、中價股勁炒一輪後，資金開始流向追啲蚊型股，近期市況靜唔少，一旦有異動，就會吸引晒市場嘅注意力。
內地雪災，聽講北方氣溫急降，天然氣供應不足，部分漲價高達三成，估唔到雪災增強一眾燃氣股炒味。中能控股（00228）喺新疆有個天然氣項目，今次市場大炒天然氣股，中能尋日亦見彈出，尾市雖然期指倒水咁插，但見隻中能愈炒愈醒神，慌死買唔到貨，既然啲買盤咁「實淨」，一於趁有勢追入中能，博佢炒上0.65元都夠和味啦，至於止蝕位一於放0.43元。
古晨