幸而祖國移動（00941）仍頂得兩下頭槌，加埋部分本地地主受高價勾地消息刺激，逆市上升支撐大市。成交額縮水至不足700億元，即使有兩新丁登場，成交額反減不增，可見沽壓唔算嚴重，只係缸邊友按兵不動，加上另有幾個新丁正在招股，凍結大量資金，令本地魚缸拍晒烏蠅。

大象料守穩10日線

大笨象（00005）連續第二日抖氣，缸湖傳聞大笨象就出售在花都兩處主要辦公物業接近拍板，但消息未有刺激其股價上升。不過，大笨象繼出售於花旗紐約和米字旗的總部大樓，跟公司日前提出「積極物業管理計劃」原則相符。可惜出售物業收益屬於一次入帳性項目，即使花都物業成功出售，此消息亦唔及之前出售米字旗國總部大樓咁震撼。大笨象散場下跌0.98%至95.5元，但古勝相信能守穩在10日線之上，後市仍有機會挑戰紅底股身份。

屋仔市場大好友，不失其好友本色，由信置（00083）牽頭的財團將參與大埔兩地皮的競購，以勾地價計，樓面呎價高達5,000元，反映屋仔價格有調整，無插水。樓市有支持，利好本地地主，本地地主昨日普遍逆市上升。

昨日再有兩新丁登場，兩股早前IPO的「中獎」比率較高，缸邊友擔心炒唔起，事實出嚟剛好相反。通天酒業（00389）收報1.48元，較招股價1.25元高出18%；龍湖地產（00960）則收報8.01元，較招股價升13.2%。作為紅色地主，而登陸本地魚缸前龜孖屐價又失守招股價，龍湖登場首日表現實令唔少缸邊友跌眼鏡。此股能在登場後吸引鑊鏟友入場，主要係因為唔少「星級」投資者入咗飛認購，包括祖國主權財富基金中投，跟國際超級鑊鏟友「食螺絲」。

近日有關紅色地主的消息都係負面居多，不過比較新淨的紅色地主，較受鑊鏟友歡迎，皆因魚缸升至現水平，唔少資金都追逐新丁同半新丁，缸邊友都怕高追會中招，參與炒作新丁卻唔需要面對蟹貨區，又或者高位受壓等煩惱。

盈利增長將大躍進

恒大地產（03333）今年捲土重來，成功登陸本地魚缸，更得到好多「煙出挑唇」投資者入股，主要睇中其土地儲備高達5,120萬平方米，超越祖國魚缸掛牌的紅色地主一哥萬科A。恒大的平均土地成本為每平方米445元（人仔‧下同），今年首三季度銷售面積、金額、土地儲備及在建面積，係眾紅色地主之首，在憧憬人仔升值下，自然值得睇高一線。恒大一○年營業額將暴增至410億元，盈利將達77億元，較今年預測盈利10億元暴漲7.7倍。

恒大能贏得投資者及機構的歡心，主要係登場時招股價打咗個大折扣，而今年斐然的銷售成績，確實地鎖定了一○年的部分利潤。雖然在過去兩年高速擴張期間，碰上了金融海嘯，但成功上市集資，可解決過高槓桿的問題，財務狀況大大改善，值得睇高一線。

古勝