本文重點
香港土地資源珍貴，政府為咗發掘更多具潛力嘅土地，連「地底」都打主意。Vincent八到，土木工程拓展署會聘請顧問，進行一項名為「善用香港地下空間」嘅可行性研究，目的是要找出全港有幾多個地洞和地庫，以及有幾多個可以改用途；其實以往都有零星嘅相類例子，好似深水灣徑18號前中央軍械火藥倉庫與金鐘前正義道軍火庫，已分別變身為私人酒窖及非牟利團體嘅多用途中心。
上述兩個前軍用倉庫原本都是「地底」空置物業，改用途後，既可保育，又可善用，都可以話係兩全其美嘅做法，不過，以往政府就無正式研究「地底」用地，而今次土木工程拓展署會進行嘅研究，可以話係首度全面檢討地下空間嘅歷史及現況，仲同時會研究可發展嘅用途，希望可善用到這類被忽視嘅土地。
零售復甦 短租旺場
聖誕節消費黃金檔期逼近，大小商戶都積極搵地方短租多做生意。Vincent聽代理老友講，荃灣一條不夜天街的其中一個面積大約2,000多呎地舖的餐廳租客，原本想在年底租約到期前走人，但業主唔肯，不過，今年零售市旺，該租客隨即搵到一家大型連鎖化妝品零售店以短約形式租到今年底，估計月租約10餘萬元，雖然比原先長租租金低一半，但有短租客頂住，減輕租金支出。
（Vincent Lau）