本文重點
《胡潤百富榜》大家聽得多，其實仲有一個《胡潤套現富豪榜》，今年已經係第3年發布，○九年嘅「套現王」就係李兆楠。呢個名好似有啲陌生，其實佢就係有「亞洲股神」雅號、人稱「四叔」嘅恒地（00012）主席李兆基細佬，亦即係「五叔」嘞！
沽平保套65億人仔
根據《2009胡潤套現富豪榜》統計，五叔今年減持平安保險（02318）共套現咗65億人仔，佔成個榜25位富豪套現總額嘅20%。有人猜度五叔其實係代佢阿哥四叔揸平保股票，孰真孰假絲絲唔知，但絲絲記得，四叔近排經常叫人「見利勿忘」，即係有錢賺時記得沽貨獲利，相信五叔喺呢方面都甚得四叔真傳。
除咗五叔，上榜嘅富豪當中以陳發樹較為港人熟悉，佢今年沽咗唔少紫金（02899），套現咗8億人仔；另外，榮智健亦透過減持中信泰富（00267）及保利香港（00119），套現咗15億人仔。至於今年升得好誇張嘅藍籌股騰訊（00700），公司主席馬化騰亦唔執輸，趁高減持股份套現咗6億人仔。
余絲韻