本文重點
絲絲相信，香港地無幾多個成功男士，會鍾意另一半喺自己工作嘅地方出現，驚有失專業形象嘛。不過，絲絲尋日見到滙豐亞太區行政總裁霍嘉治嘅太太霍君蘭現身中環滙豐總行，而且仲肩負重任添。
霍嘉治撐老婆場
滙豐舉辦嘅「香港有格」漫畫展尋日正式揭幕，身為策動人嘅霍太亦有出席揭幕儀式，至於佢老公霍嘉治就梗係挺身撐場啦。霍氏伉儷同台現身，霍太幽默咁話，平時成日聽老公喺台上演講，無諗過自己都可以企喺台上發言喎。
一向對藝術好有研究嘅霍太，亦不忘稱讚參加今次漫畫展嘅25位本地漫畫藝術家，以及15位大專院校美術系學生，大讚佢哋好有創意，透過畫作可將香港動感一面、香港人嘅正能量及堅毅不屈精神展現眼前。
揭幕儀式上，大會亦邀請到本地創作人林海峰帶埋佢設計嘅公仔漫畫到場，霍氏伉儷就負責喺畫上加添創意，霍生貼咗個心心，霍太就畫咗個笑哈哈圖案，話代表愛心同埋樂觀精神，睇到佢兩公婆咁合拍，實在羨慕死人！
余絲韻