本文重點
滙豐前亞太區主席艾爾敦喺離職後基本上係退而不休，佢不但穿梭亞太區各大小城市，而且經常議論區內地方嘅時政。尋日佢喺自己個Blog度炮轟一個中環老問題，佢話唔少中環老細為咗趕時間，叫司機泊部車喺中環隨時接送，結果搞到中環大塞車，而且停車又唔熄匙，嚴重污染空氣，艾爾敦批評呢啲係極其自私嘅行為。
Blog內激鬧 有相為證
絲絲睇艾爾敦嘅Blog咁耐，佢講嘅大小問題都唔係無的放矢，但少有好似今次講嘢咁激。早前佢話多個亞洲大都會均以躋身國際金融中心為目標，連伊斯坦堡都想進身金融中心，做份研究報告喺IMF傳閱，佢為此評彈咗幾句，話咁多城市想做金融中心，究竟佢哋知唔知自己想做啲乜？
話說回來，今次艾爾敦重提中環「遊車河」引致大塞車嘅問題，咁多年政府都束手無策，好明顯老艾非常唔滿意，佢話無幾多世界級城市嘅運輸管理好似香港咁差。可能有人會挑剔話，總有啲地方差過香港，但因為佢以香港為家，所以老艾零舍肉緊，話中環嘅污染問題真係好難頂，佢仲寫咗幾個講明係罪魁禍首嘅車牌，為存厚道，無寫晒全部數字，只提NP 36××、NZ 15××等，佢仲話有相為證，無屈錯人。
余絲韻