市場氣氛好，大市愈炒愈熱，基金大戶齊集香江，在熱錢水浸下，唔少基金大戶根本唔理價，總之有貨照掃，所以市場愈貨乾者，升得愈急勁。最開心莫過班炒友，日日炒幾轉，遲早戴巨鑽。市場啲貨愈炒愈貴，資金發掘緊啲落後股，近日所見啲仙股都開始散發出炒味，遲早又係落鑊嘅材料。
資金發掘落後概念，美元弱，油價易升難跌，全球熱錢四出搵油股買，早前兩大油股已經畀班基金掃到高晒，近期積極抖氣中。
中信資源（01205）於八月炒過一轉後，股價回落橫行咗成三個月，班芬佬積極收咗咁耐貨，貨源慢慢歸邊，而該股各條平均線亦慢慢集中，尋日成交開始回升，似準備再炒過，落後股不妨買少少坐吓，一旦開車或有唔錯驚喜，暫時向上睇3元，止蝕位可以放於2.1元。
古晨