鑊鏟友不愁寂寞

口痕友話今日黑色星期五，淡友可能借題發揮質低魚缸，古勝不敢苟同，淡友經過日前急挾逾千點後，元氣大傷，加上魚缸水浸，好友唔出手，淡友亦唔惡得出咩樣，若然恒指回落至22,200點，可以把握機會掃貨。

日前本地魚缸火車頭大笨象（00005）急升後見回吐，昨日跌1.1%，報收92.95元；祖國移動（00941）跌1.4%，報收74.35元。至於紅色錢莊亦開倒車。中信泰富（00267）擬向祖國鋼廠出售澳洲鐵礦石項目產出，下半場升幅擴大至超過一成，報收22.2元，升9.09%，排行大隻佬升幅冧巴溫。

雖然大隻佬大多要抖氣，但鑊鏟友不愁寂寞，紅色分子跟二三線股仔，鑊鏟派對繼續開，落鑊股份更多至應接不暇，鑊鏟友未能招架，向所有炒股施展銀彈攻勢，只能嘆句「敵人太多，子彈太少」。

紅色砵砵車愈升愈有，日前多間外資行唱好吉汽（00175），股價再升近一成，盤中創3.59元新高，報收3.54元。慶鈴（01122）追落後，但始終質素差一截，日前高見2.51元後回落，昨日反彈3%，報收2.32元。

紅籌潮未到戲肉

孖屐憧憬紅籌股相繼進行重組，「多呢咪」越投（00123）成功做咗場樣板戲，股價高處未算高。昨日輪到首長國際（00697）發力，突破悶局，股價爆升11.7%，高收1.52元。航天萬源（01185）日前以8粒神批盪，在下收到風，好戲在後頭，昨日跟航天控股（00031）齊齊回調，但跌幅極為溫和，似有心人壓價收集，多過似派貨散水。

迪士尼拍板在上海興建主題公園，相關上海概念股已落鑊，日前以上海為基地的東航（00670），昨日走勢先見大突破，相對其他兩紅色飛機，東航要急起直追，因為實在係落後。

有望脫離負資產

東航已獲祖國證監會批准非公開發行不超過13.5億股A股，而管理層日前亦表示欲在本地魚缸發行4.9億股H股，冀共可集資70億元人仔。若然集資成功，可望扭轉截至第三季仍是每股負資產0.44元人仔的劣況。東航擺脫負資產的下一步，當然係進行重組，呢個亦係近日個別紅色分子，包括國企及紅籌熱炒的最大理由。

隨住全球經濟逐步復甦，斷估專家均表示航空業亦會隨之復甦，「大魔頭」預測，東航第三季收入增長強勁，維持「與大市同步」評級。至於「美人林」則認為祖國航空業的復甦將繼續，市場強勁令定價和利潤改善，建議買入三架紅色飛機，給予東航目標價為2.95元。

古勝