本文重點
最近新股排隊上市，絲絲尋日見到理文造紙（02314）嘅CEO李文俊，記得佢喺○六年曾入飛認購新股，於是就問吓佢近期有無抽新股，佢話公司近排好忙，要專心搞好公司業務，所以好少留意新股，寧願留意吓自己公司股價好過。絲絲舉腳贊成，留意自己公司股價要緊，話晒係自己身家嘛。
專心搞好理文業務
絲絲記得喺○六年新股當旺時，有唔少富豪去認購新股，李文俊亦有入飛，嗰隻新股係建滔化工（00148）分拆出嚟嘅建滔積層板（01888），當時李文俊話自己同建滔化工主席張國榮係朋友，所以捧場。
不過，今年建滔化工再分拆煤化工業務上市，李文俊就話無時間睇新股，所以應該唔會捧場，專心做公司業務。
佢又預告，話理文將會做多一類型紙品，今年底公司就會推出自己品牌嘅A3及A4紙張。絲絲心諗，唔通佢哋想同將會來港上市嘅Double A爭一日之長短？
余絲韻