10/11/2009

播放本新聞相關短片
查詢股票編號

絲絲講場:梁培華接掌富邦香港

自從富邦銀行(香港)董事總經理兼行政總裁李晉頤喺今年九月辭職後,佢嘅繼任人選遲遲未有落實,直至尋日先正式揭盅,原來係由「同聲同氣」、同樣嚟自台灣嘅梁培華接任。

機緣巧合中年入行

梁培華喺○五年加入富邦集團,依家掌管台灣富邦金控消費金融業務。唔講唔知,呢位58歲嘅資深「賓卡」,其實係IT人出身,佢喺40幾歲先加入金融業。至於點解人到中年先毅然轉行?原來係同健康有關。

絲絲聽聞,擁有美國凱斯西儲大學作業研究碩士學位嘅梁培華,畢業之後曾任職多間資訊公司,嗰陣時佢每日除咗返工應酬,業餘仲兼職教書,捱到身子壞晒,直到41歲嘅某一日,佢嘅身體響起警號,令佢決心辭職。梁培華休息咗一段日子之後,喺機緣巧合之下,加入咗花旗銀行(台灣),就咁入咗行。

身為銀行高層,自然有好多應酬活動,不過有好友同絲絲講,話原來梁培華深諳養生之道,好清楚早睡早起對健康有幾咁重要,所以連下屬想同佢聯誼都一律No way!

余絲韻